ဒီတီ // ဂျိုဇော်
ဒီတီ // ဂျိုဇော် ( ဟန်သစ်မဂ္ဂဇင်း၊ အမှတ်(၅၇)။ မတ်လ၊ ၁၉၉၅ ) —- D.T.125.R. တန်ကြေးက ၅ သိန်း ၂ သောင်း၊ ကောင်းသလား မမေးနဲ့။ အခုလို အဝေးပြေးလမ်းမကြီးပေါ်မှာ တနာရီ မိုင် ၈ဝ နှုန်းနဲ့ မောင်းမိပြီ ဆိုမှဖြင့် နတ်မြင်းပျံ စီးရတဲ့ အတိုင်းပဲ။ တကယ့်ကို တိမ်တိုက်တွေရဲ့ အကြား၊ လေထုကို တဟုန်ထိုး ထွင်းဖောက်ပြီး သွားနေရသလို။ မြန်လိုက်သမှ ရင်ထဲမှာ အေးခနဲ ဟာခနဲ။ ဒီတီ မော်တော်ဆိုင်ကယ် စီးရတာ နတ်မြင်းပျံ စီးရသလိုပဲ ဆိုတာ တကယ့်ကို အလိုက်ဖက်ဆုံး တင်စားမှုပါပဲ။ ဒါဟာလည်း တကယ်တော့ ကျွန်တော်ရဲ့ စကားလုံး မဟုတ်ပါဘူး။ ဥပမာ စကားလုံး အရွေးကောင်းတဲ့၊ လောလောဆယ်တော့ ကျွန်တော်ပခုံးကို ဆုပ်၊ ဘုရားတပြီး လိုက်လာတဲ့ ပန်းပွင့်အသည်းနဲ့ သူငယ်ချင်းရဲ့ စကားလုံးပါ။ ကျွန်တော်တို့ ငယ်ငယ်က “ပန်းပွင့် အသည်းနဲ့ သူငယ်ချင်း” ဝတ္ထုတပုဒ် ကြားဖူးတယ်။ ဘယ်သူရေးလို့ ဘာအကြောင်းလဲ ဆိုတာတော့ မမှတ်မိတော့ဘူး။ ဒါပေမယ့် ကျွန်တော့်သူငယ်ချင်းကတော့ဖြင့် အဲသည် နာမည်နဲ့ လိုက်ဖက် နေတာတော့ အမှန်ပါပဲ။ "ဟေ့ကောင် … ဂျော်ကီ၊စပိ(ဒ်) လျှော့တော့ကွာ။ ဒီလောက်ဆို စိတ်ချရလောက်ပါပြီ” (ဖြတ်ပြီး ပြောရရင်ဖြင့် ကျွန်တော့် နာမည်ပြောင်ကဂျော်ကီပါတဲ့။ ဆိုင်ကယ် အစီးကြမ်းလွ...
